Verkeerde kollum en een fietsdag

Om de aandere deensdag staot d’r een kollum van me in de Liwwadder Kraante. Vandaege was et mien beurt weer. D’r ston wel iene in, mar wel een verkeerden iene. De kollum Flutmail van SEAT het op 15 april al in de kraante staon mit as titel SEAT. Ik hebbe drekt een mailtien stuurd. Een mal spul vanzels. Mar och ja, overal kun dingen wel es even misgaon. Over twie weken beter.

Ik hadde vandaege een vri’je dag, hoefde gien boeken te verkopen in Berkoop. We hebben zodoende een lekkere fietstocht van 44 kilemeter maekt. Vandemorgen was et eerst bewolkt, vandemiddag was de zunne d’r vaeke volop bi’j. De temperetuur was heerlik: 22 graoden. Omdat d’r bujjen kommen konnen, bin we niet veer van huus gaon. We hebben de fietsen aachter op ‘e auto zet en bin naor de Driewegsluus reden. Daor bin we begonnen te fietsen. We hebben eerst een slinger deur de Rottige Miente en bi’j de Scheene langes maekt en bin weer naor de Driewegsluus gaon. En doe over de Lendediek naor Ossenziel en et prachtige pad langes mit al die broggies naor Kaelenbarg. D’r weren een protte fietsers onderweg en hoe dichter we bi’j Kaelenbarg kwammen, des te meer fietsers in regenpakken we zaggen en hoe meer poelen d’r stonnen. We weren van doel om an te stikken op et terras van hotel Het Rietershuijs bi’j de brogge in Kaelenbarg. Mar d’r hong een ketten veur et terras langes mit een bottien mit et prachtige opschrift area closed. Dan weej’ vanzels votdaolik daj’ in et Nedersaksische Kaelenbarg belaand binnen. Et terras was sleuten vanwege et noodweer dat ze krek had hadden. Een vrouw vertelde dat ze driefdeurnat regend was. En wi’j hadden gien drup had. We hebben binnen wat drinken en een Blokzielder Brokke had. Ik hebbe daor ok nog mailkontakt had mit de kultuurredaktie van de Liwwadder Kraante. We bin doe veerderfietst over Nederlaand en Wetering naor Ooldemark. En doe hewwe nog een slag bi’j et Wiede van de Lende langes maekt. In et resteraant bi’j de Driewegsluus hewwe tussen vier en vuuf ure lekker waarm eten had. Et was een mooie en ontspannen dag. Hieronder twie foto’s die ‘k onderweg maekt hebbe. Boven: et was drok mit boten in Kaelenbarg. De zunne was d’r hier volop bi’j. Onder: de mooie buurtschop Nederlaand. Hier kreup de zunne evenpies vot.