Verjaordagsvesite

Ik bin vandemiddag op verjaordagsvesite naor Sneek west. Kammeraod Jelle is vandaege 79 jaor wodden en dat hewwe vierd. Hi’j scharrelt al een levenlaank mit een jaor en een maond verschil in leeftied aachter mi’j an. We hopen allebeide dat dat nog een hiel schoft zo blieven mag. We kennen mekeer al 63 jaor van haever tot gotte. Dat daenken we in ieder geval, mar meensken bin vanzels nooit te deurgronnen. We hebben vandemiddag ok wat vergeten. Ik zol daor et laeste nommer van Landleven bekieken, daor hebben zi’j een abonnement op. En van meerdere kaanten heb ik al te heuren kregen dat ik in dat laeste nommer stao. Dat klopt. Al wel een vorrels jaor leden bin ‘k veur dat mooie tiedschrift interviewd deur Jolanda Hofland uut Lochem. Zi’j het doe ok een foto van me maekt bi’j de Kuundersluus tussen Berkoop en Ooldehoorn. De taelgreens van et Friese en et Stellingwarver taelgebied. Now ja, binnenkot is Gerda ok jaorig en za’k ongetwiefeld weer naor Sneek gaon. Lichtkaans da’k et dan bekieken kan. Awwe d’r dan an daenken… Dat is mit oolder woddende meensken vanzels nog mar de vraoge. Onderwegens naor huus heurde ‘k op ‘e autoradio flitsen van de Olympische vuuf kilemeter hadrieden veur manluden. Dat is ok niks wodden. D’r bin jaoren west dat de vuuf kilemeter een poer Nederlaanse angelegenhied was. Dan wunnen we goold, zulver en broons! De room is van de melk, mar morgen is d’r weer een dag.