Verjaordagsfesien

Ik bin de dag begonnen  mit et rippeteren van verhaelen en doe bin ‘k deur de sni’j naor mien eigen verjaordagsfesien stapt in oons mfc De Ni’je Stienze. Dat begon om half elf. Fettje en ik weren d’r al om tien over tiene. Vri’jwilligers weren doe nog doende mit de boel butendeure begaonber te maeken. Ze hadden et daor best veur mekaander. De vri’jwilligers aachter de bar weren ok in et zoolt bebeten. D’r hadden toch nogal wat meensken ofzegd. Vuuf meensken weren op vekaansie naor Terschelling, Portugal en Spanje. Drieje dusten niet te kommen vanwege et winterweer, d’r weren ok nog twie meensken ziek wodden. En goenend hadden aandere bezigheden. De meensken die et veerste wegkwammen weren Jan en Diana uut Aalten en die weren d’r praktisch et eerste. Dat bin echte Aachterhoekse iezervreters! Mooi was et ok dat Deli, Elroy en kleine Miles vanuut Arnhem kommen weren. Eerst hewwe koffie/thee en oranjekoeke had. En vanzels lekkere happies. Kammeraod Douwe Kootstra hul een geweldig mooie feestrede. Daor kon ik wel tevreden mit wezen. Et stamppotbuffet van De Rustende Jaeger uut Hooltpae was meer as veurtreffelik. Heerlik! Stamppot wottels/siepels, stamppot boeremoes en stamppot zoerkool. Mit tippen gelderse wost, spekkies, speklappies en sukadelappies. D’r was ok een schaole mit rauwkost. En dan nog een naospiezebuffet. Superlekker! Alles wat d’r overbleef hewwe in deusies daon, dat verschillende meensken kun morgen nog stamppot eten. Et is ja zunde en gooi eten vot. Dat kan en mag niet! Nao et eten was d’r nog koffie/thee veur alleman. Om kwat over drieje was et oflopen en ik kan weerommekieken op een geweldig genoeglik en slaegd verjaordagsfesien. Et was allienig jammer dat de faunatoren d’r nog niet ston. Die kowwe zodoende niet bekieken. Dat was de schuld van de winter. Onderstaonde foto’s wodden me toemaild deur Jelle en Grytsje Kingma. Boven: Kammeraod Douwe Kootstra hoolt hier zien feestrede. Onder: ik zitte hier te genieten van et stamppotbuffet mit Deli, Elroy en Miles.