Verjaordag

Et was vandemorgen nog et mooiste weer van de wereld, dat ik bin op ‘e fiets naor fysiosport in Wolvege west. Doe ‘k weer thuus was he’k de kraante lezen en me gauw een tosti klaormaekt en doe bin ‘k in de auto stapt en naor Sneek reden. Gerda vierde vandaege heur verjaordag. Et was een genoeglike middag mit advekaot en een protte lekkere happies. Ik bin in de regen naor Sneek reden en ik bin in de regen weer naor huus gaon. Wat een verschil mit vandemorgen.

Verschillende vrouwluden die mien dagboek lezen heb ik de keunst bi’jbrocht van et overholen en weer in de bluui kriegen van ammarillen. Dat lokt Bonnie uut Drachten allemachtige goed. Ze krigt al heur ammarillen van ’t jaor weer in de bluui. Dat is mooi. Ze stuurde me een foto toe. Zie hieronder. De meerste meensken smieten de bollen as ze uutbluuid binnen vot. Dat is doodzunde. We gooien van alles te vule vot en daor wodt de wereld niet beter van. Ammarillen kuj’ prima weer in de bluui kriegen. Bin die van Bonnie niet mooi?