Verjaordag

Ik doe nooit vule an mien verjaordag, dat d’r kommen altied mar een peer meensken. Om de vuuf jaor doe ‘k d’r wat meer an, mar doe ‘k 75 wodde was alles op ‘e giebe deur de corona en he’k dus niks daon. D’r kon en moch niks orgeniseerd wodden. As et goedgaon blift za’k begin ankem jaor 80 wodden. Dan geef ik een dag of wat laeter, op zundag 11 jannewaori, veur een beparkt koppeltien volk een stamppotbuffet in oons mfc De Ni’je Stienze. D’r is ok een toetiesbuffet bi’j. Fettje en ik bin vandemiddag naor De Rustende Jaeger in Hooltpae west en hebben alles mit Marcel bepraot. Zi’j verzorgen et buffet en dan komt et grif dikke in odder. Et blift liekewel een bescheiden fesien veur naoste femilieleden en vrunden, een peer (oold-)kollega’s, mien executeurs-testementair en de voogden van de stichting die mien naeme het. Ieder mag trouwens zien of heur partner (m/v) mitnemen. Mien goeie kammeraod en kollega, de Friese schriever Douwe Kootstra, zal een feestrede holen. Op ‘e dag van mien verjaordag bin ‘k vermoedelik de hiele dag vot.