Verhaelen

Plaetst op 17 meert 2025.

Et gaot toch nog wat beter mit mien ammarillen as dat ik eerst docht. Ik kriege d’r toch nog zeuven van de elf in de bluui en van die zeuven bin d’r drieje daor twie staelen in kommen. Dat is toch best wel mooi!

De laeste daegen he’k de twaelf wat langere verhaelen, die ‘k nao et uutkommen van mien laeste verhaelebundel Naozoemerlaand in 2023 schreven hebbe, nog es goed naokeken. Ik hebbe d’r nog wat tikfouties uuthaeld en hier en daor nog wat veraanderd en hopelik verbeterd. Ik blieve d’r almar mit ommeprutsen, et is me aenlik nooit goed genoeg. Et bin allemaole verhaelen van omtrent twieduzend woorden, behalven et verhael Parredies, dat springt d’r wat lengte anbelangt uut. Et is twie keer zo lange as de aanderen. Hiel misschien kommen ze wel in toch nog een ni’j boek. Mar even zien hoe et gaot. Hier dan de titels van de twaelf verhaelen en tussen haokies et tal woorden: Blauw (2288), Kaspar (2168), Lies (1942), Mombasa (2465), Ouwe stomp (2143), Overkaant (2361), Parredies (4678), Rooie wolven (1948), Rooie Zee (2031), Silverboy (1939), Sirene (2094) en Weimar (2228).