Verborgen in het verleden

Nao Verborgen in de sneeuw en Verborgen in de schaduw heb ik now Verborgen in het verleden van Viveca Sten lezen. Een prachtige serie Zweedse thrillers. In dit dadde boek wodt zaekevrouw Charlotte Wretlind dood vunnen in heur hotelsuite in Are. Ze is op een gruwelike meniere van kaant maekt. D’r is votdaolik paniek in et gebied. Charlotte bliekt wat te maeken te hebben mit et beroemde barghotel in Storlien. Dat is wat verrinneweerd, mar d’r bin plannen om et geweldig op te knappen. Daor is niet iederiene gelokkig mit. Daniel Lindskog en zien kollega Hanna Ahlander perberen de zaeke op te lossen en dat lokt heur vanzels. Ik hope dat d’r meer boeken over dit pelisieduo kommen, want et slot raost om een vierde diel. Hanna is gek op Daniel. Dat wet Daniel niet. Hi’j is ok gek op heur, mar hi’j het een vrouw en een kiend. Mar et huwelik mit zien vrouw verlopt niet zo makkelik. En wat Hanna en Daniel nog niet weten, mar de lezer wel, is dat Daniel zien vrouw verliefd wodden is op een aander en weinig meer veur Daniel vuult. Dat ja, hoe komt dit? Dat leze ik graeg in een vierde diel. Viveca Sten het ok een serie van acht boeken schreven over moorden in et plakkien Sandhamn. Die bin ok verfilmd en op ‘e tillevisie west as The Sandhamn Murders of in et Zweeds Morden i Sandhamn. Ik hebbe pattie wel zien, mar ik wil al die boeken eins ok lezen.