Verborgen in de schaduw

Vandemorgen zag ik in de kraante dat Jan From uut de tied raekt is. Hi’j is krek gien tachtig wodden. Jan speulde vroeger mit in de kristelike brassband Euphonia. We hebben mekeer dus vaeke tiedens et jaorlikse Oranjekonsert zien. Ooit vertelde ik tiedens ien van die Oranjekonserten, et zal zoe’n twintig jaor leden wezen, et hilarische verhael Tina Turner en Jan From. Jan From from Wolvege gong naor een konsert van Tina in Utrecht om heur te vraogen as ze mitdoen wol an et Oranjekonsert in Wolvege. Ik hebbe zelden meer sukses mit een verhael had. Et lachen golfde deur De Steense. Daor daenk ik vandaege weer an…

Ik hebbe een veur mi’j ni’je Zweedse thrillerschriefster ontdekt: Viveca Sten. Een schoffien leden las ik Verborgen in de sneeuw en now he’k Verborgen in de schaduw lezen. Wat verschrikkelik spannend. Ik kon et boek haost niet daeleleggen. De boeken gaon over rechercheur Daniel Lindsog en zien pelisiepartner Hanna Ahlander. Zi’j begint him trouwens de hieltied aoriger te vienen. Wat dat nog wodden moet… In et laeste boek wodt de bekende Olympische skier Johan Andersson vermoord vunnen in de sni’j. Neffens zien vrouw hadde hi’j gien vi’janen, mar dat is vanzels niet zo. Et verminkte lichem ligt mit de hanen vaastebunnen in een lappe bos.  Toegeliekertied wodt Rebecka Ekvall, de vrouw van een sektepredikaant, deur heur man mishaandeld. Et dot blieken dat beide zaeken mit mekaander te maeken hebben. Daniel en Hanna lossen et vanzels op, mar dat gaot niet zomar. Wat een prachtig boek! Now moe’k vanzels et dadde boek in de riegel Verborgen in het verleden ok nog lezen.