Veegmesiene

Et was een drokke dag. Vandemorgen kwammen de beide tuunmannen, Arnoud en Jaap, om de boel om huus henne netties te maeken. Dat is heur geweldig goed lokt. Ze hadden een veegmesiene bi’j heur. Ik mag et niet lieden as d’r tussen stienen en tegels van oprit en aandere bestraoting grös, ontuug en mos zit. Tot now an toe gong ik d’r twie keer in et jaor mit een krabber an een lange stok bi’jlanges. Mar ik zitte now op een leeftied dat me dat te bezwaorlik wodt. De veegmesiene is dus een uutkomst. Alle ongerechtigheden bin vot en de stienen bin d’r schoner en lochtiger van wodden. Alles liekt wel ni’j. Dit kost vanzels extra, mar daor he’k dus altied zunig veur west. Zoda’k hier now wonen blieven en alle hulpe betaelen kan. Nao de koffie mit de tuunmannen bin ‘k naor Berkoop gaon. Daor he’k de boeketaofel inricht veur de Eupen Stal die zaoterdag begint. Ik bin daor vuuf van de zeuven middaegen. De laeste jaoren was dat zes van de zeuven middaegen. Ik neme iene dag extra vri’j. Fettje en Gerrie vervangen me dan. Dat bin ok gewoepste verkopers. De laeste twie jaor bin ik tiedens Eupen Stal in et ziekenhuus belaand. Twie jaor leden mos de galblaoze d’r uut en vleden  jaor ha’k es weer een daarmofsluting. Ik hope dat et dit jaor goed gaot. Mar as et al misgaot, hebben ze meensken klaorstaon die me dan wel vervangen willen. Dat is hiel mooi. Want ja, elke kaans om boeken verkopen te kunnen moet in disse tied anpakt wodden. Om twaelf ure wa’k weer thuus en doe he’k d’r veur zorgd dat de tuunmannen poddestoelesoep en drinkyoghurt kregen. Doe die de put d’r uut hadden, wa’k om twie ure an et waarme eten veur mezels toe.

Ik kieke mar weinig tillevisie in de zoemer. Ik vien d’r gien klap an en kan mien tied dan beter besteden mit lezen en eventueel schrieven. Mar gisteraovend is de ni’je serie van Shetlaand  begonnen en dat is netuurlik meer as de muuite weerd. Dat wodt vanaovend weer genieten.