Vandaege fysiodag en gister Aalten

Vandaege was et een fysiodag. Vandemorgen om negen ure wa’k al in Wolvege veur fysio-massage bi’j Marian en daornao he’k gauw een flut bosschoppen daon. Ik moet d’r veur zorgen da’k over twie weken een hiele flut in huus hebbe a’k niet meer mit de auto bi’j huus kommen kan. Vandemiddag wa’k om twie ure bi’j Freek veur fysiosport. Et wodde een intensief ure. Netuurlik kennen verschillende meensken me daor. Now ja, dan zien ze de schriever en verhaeleverteller him in de kotte broek in et zwiet warken. Dat is weer es wat aanders.

En dan nog even over gister… Ik was gistermorgen, nao een tocht deur almar regen, om tien veur elf in Aalten bi’j Jan en Diana in heur ni’je huus. Een mooi huus! De gebakkies stonnen al klaor. We hebben genoeglik bi’jpraot. Tussen de middag hewwe heerlike gruuntesop en bolties bi’j heur had. Et was mooi dat Raymond en Leon ok langeskwammen. Middags biwwe naor de Mark van Aalten kuierd. Daor weren hadfietsers doende die om de karke henne jakkerden. Wi’j hebben et Nationaol Onderduukmuseum bekeken en de wisseltentoonstelling over et Dutch National Battalion. Daor hadde ik nog nooit van heurd, mar et is daor een begrip. Aj’ zoks allemaole bekieken weej’ weer zeker dat vri’jhied et hoogste goed is. Lao’we d’r veur zorgen dat oonze demekraosie in staand blift en dat ophitsers gien kaans kriegen. In de museumwinkel he’k een pakkien Aachterhoekse gevvel keukskes kocht. We hebben aovens heerlik eten in resteraant Het Noorden van Aalten. Daor weren een protte eters en et eten was heerlik. Ik hadde zalmfilet. Et passeniel zong wel drie keer veur iene die jaorig was en daor mit een koppeltien volk uut eten was. Om even veur acht ure bin ‘k daor mit een poedegien bolties in de auto stapt en om kwat veur tiene wa’k weer thuus nao een mooie dag. Op zundag 6 juli za’k weer naor heur toe, want dan viert Diana heur 75^ste verjaordag in de femiliemeule van Jan in Winterswiek. Hieronder twie foto’s. Boven: dit is et Nationaol Onderduukmuseum an de Mark. Onder: et maegien dat oons bediende het oons op petret zet in et resteraant.