Van en naor Sneek

Vandaege hawwe de jaorlikse boottocht mit de oold-kollega’s van de belastingdienst. In Wolvege heb ik vandemorgen Jan, Durkje en Riemie oppikt en doe biwwe naor Sneek reden.We hoefden mar een kleinighied bi’j te betaelen. We bin dus veural op kosten van de gemienschop op stap west. We hebben vanzels jaorenlaank veur et heil van et vaderlaand warkt. Dan mag zoks ok wel. Zol zoks trouwens ok wel van menister Faber meugen? Mar och, wi’j bin vanzels allemaole Nederlaans en veural blaank. Die meugen van Faber grif meer as kleurde asielzukers. Mit honderd man hewwe geneuten van een mooie dag. Mar wat een verschil in temperetuur. Eregister veerde ik in een kotte broek en een shirtien en now ha’k de winterkleren an. We hebben vanuut Sneek een tocht maekt mit de Toerist VI die an de Jousterkade lag. We mossen de auto kwiet zien te wodden op et Normandiaplein. Wat was dat duur! Wat een inklauwers daor in Sneek! We kregen eerst drinken en oranjebak an boord en veerden deur Ielst en Osingahuzen, bi’j Heeg langes naor Wooldsend. Daor mochten we van boord. Laeter biwwe over et Heeger- en Sneekermeer weer naor Sneek veerd. Onderweg kregen we een heerlik waarm en koold buffet an boord. We mochten drinken zovule awwe wollen en ze kwammen ok nog langes mit bitterballen. Al mit al was d’r gien nee te koop en was et een prachtige dag. Wat zaggen we schitterend netuurlaand onderweg dat geel was van de botterbloemen. Zo heurt et laand d’r uut te zien! En dan al die jonge gaansies… Hieronder twie foto’s. Boven: hier staon Jan, Riemie en Durkje mit kollega’s veur de karke De Karmel. Onder: hier lopen Jan en Riemie in de richting van de meule ‘Lam. In et meulewinkeltien naost de meule hewwe lekkers kocht. Ik hebbe biologische keekmiks en meulemuesli kocht.