Johan Veenstra
Stellingwarver schriever en verteller

Van alles en nog wat

Plaetst op 3 oktober 2024.

Et was vandemorgen wel wat fris mar de zunne was d’r drekt al volop bi’j. Dat ik bin lekker op ‘e fiets naor Berkoop west. Ik hebbe daor et ni’je onderkommen van de Schrieversronte bekeken.. Hatstikke mooi. Wat een ruumte hewwe daor! Fettje was drok an ’t centetellen. Dat is mooi wark. De sutelaktie het dit jaor 2.104 euro opbrocht. D’r weren mar weinig sutelders en twie keer mos een aovend vanwege de regen oflast wodden.

Ik kreeg mooie reakties op mien kollum Naojaorsdag die deensdag in de Liwwadder Kraante ston. Frits mailde me prachtige foto’s van zunsondergangen die hi’j maekt hadde. Henk mailde dat hi’j mankeliek van mien kollum wodden was. Hi’j was an et aende van de zoemer trouwens ok altied wat mankeliek, krek as ik bin. Want ja, hoevule zoemers wo’n me nog toeschikt? Dat vuulde hi’j percies zo an. We bin lieke oold… Dat verklaort lichtkaans een protte. Bonne mailde me dat ze mien kollum plaetst hadden op ‘e website De Strampel van de Fryske feriening fan einekoerflechters. Ik wus niet iens dat d’r zoe’n verieninge beston.

Omdawwe gister naor Volendan weren, was ik gisteraovend niet bi’j de jaorlikse herdaenking in et vroegere joodse warkkaamp It Petgat in Blesdieke. Frits Barend zol daor een toespraoke holen. Ik vun et wel spietig da’k d’r niet bi’j was. Ik vien aenlik da’k daor wel wezen moet, mar ie kun mar op ien plak toegelieke wezen. Butendat is et om disse tied van et jaor bi’jtieden wel es wat fris om daor, onder de aovend, een ure op een stoeltien te zitten. Et is op 2 oktober niet altied lekker waarm weer.

Kammeraod Karel uut et Braobaanse dörp Zeelaand stuuurde me et boek De taal achterna van Wim Daniëls, die slim bekend van radio en tillevisie is. Wim gaf vleden jaor een lezing veur de Kring van Bercoop in Berkoop. Of is dat al twie jaor leden? Ik hebbe doe nog even mit him praot en ok een boek van him kocht. Now hul Wim, die grootwodden is mit de tael van Aarle-Rixtel, dus een lezing in Zeelaand. Hi’j vertelde Karel dat hi’j mi’j wel kende en signeerde een boek veur me. Voor Johan, schreef hi’j d’r in. Ik bin slim vereerd en zal et ongetwiefeld mit genoegen lezen.