Uutreiking Rink van der Veldepries

Vandemorgen he’k naor fysiosport in Wolvege west en vandemiddag om 2 ure wa’k al weer op et parkeerterrein van Van der Valk in Drachten. Daor he’k kammeraod Douwe oppikt en doe biwwe naor resteraant It Polderhus op ‘e Veenhoop reden. Daor wodde vandemiddag de Rink van der Veldepries 2026 uutreikt an Marga Claus veur heur roman Libbe. Ik kende Marga allienig van naeme, mar was nog niet eerder mit heur in de kunde kommen. Dat is now dus gebeurd. Een aorige vrouw! Ze vertelde me dat ze ok een fielsetaosiekaorte kregen hadde van de Stellingwarver Schrieversronte en dat vun ze hiel mooi. D’r was een protte volk en een mooi pergramme mit toespraoken, gedichten en meziek. Marga kreeg de pries van de betreffende wethoolder van Smallingerlaand. Die zee veerder niks. Me donkt, dat hadde aenlik wel zo heurd. Nao ofloop hewwe nog drie kertier mit alderhaande kunde praot en d’r weren lekkere happies en draankies. Dat is ok nooit weg. Douwe en ik zollen doe nog tegere eten in De Polle. Dat ligt daor pal an et waeter, we bin d’r vaeke in de boot bi’jlanges veerd. Op een bod ston dat et eupen was en 50 meter lopen. Dat klopte niet. Et was 500 meter lopen en et was niet eupen. Wel mooi trouwens da’k doe an et waeter ston, vlakbi’j Ie-Sicht, daor we zo vaeke mit de boot langeskommen. Doe hewwe eten in It Polderhus. Elk een lekkere schnitzel. De meensken die daor et resteraant hebben wonen in Wolvege en praoten Stellingwarfs. Nao et eten he’k Douwe naor huus brocht en doe bin ik vanuut Veenwoolden weer op huus an gaon. Poes zat zokrek buten veur de deure op me te waachten. Et was een mooie middag!