Uutneudiging Vlechtmuseum

Ankem weke woensdagmiddag komt Preenses Beatrix naor et Nationaol Vlechtmuseum in Noordwoolde. Ze zal daor de originele wiege onthullen die daor goed 88 jaor leden veur heur maekt is en doe naor Peleis Soestdiek brocht is. De wiege was spoorloos verdwenen en is lessend weer veur ’t locht kommen. A’k me niet verzinne argens in Zeelaand. Now blift hi’j veurgoed in et Vlechtmuseum. Ik mag d’r die middag bi’j wezen en kreeg gister een uutneudiging. Dat vien ik een grote ere. In coronatied kreeg ik een Zulveren Anjer van de Preenses. Ik hebbe doe ni’je kleren kocht veur die feestelike gebeurtenis. Vanwege corona mos ik doe moederziel allienig naor et Peleis op ‘e Dam. Ik trekke ankem weke diezelde kleren weer an. Nao al die jaoren doe ‘k dan ok dat doe kochte strik weer veur. Veurda’k indertied naor Amsterdam gong mit een taxi het Fettje me et strik nog veurdaon. Ik wete niet meer hoe dat moet. En kapster Bertha het me morgens in alle vroegte et haor nog wat beredded. Dat hoeft now allemaole niet. Ik gao de kommende vrí’jdag naor Bertha en et strik hangt al jaoren klaor in de kaaste. Ik kan et zo over et heufd doen.