Uut rieden

Omda’k zo dwiel was he’k vandemorgen toch mar es naor de dokter west. D’r zal even bloedprikt wodden en zo. Mar ik moet d’r mar op rekenen dat et allemaole stress is. De dokter zee dat ik een gevulige man bin. En dat is now krek de ellende. Te gevulig. Ik hebbe gauw argens last van. En ik hebbe een groot verantwoordelikhiedsgevuul en zelsdiscipline. Alles moet goed. Dat moet et ok, mar et nekt me now op disse leeftied. An de aandere kaant kan ik daoromme aorig schrieven en gevulig vertellen. Elk veurdiel het zien naodiel. Mar dit gedoe iederkeer is et niet weerd. Ik zal in et kommende halfjaor mit alderhaande dingen opholen. Ik kan veurlopig ok niet mit alderhaande meensken die ‘k dat beloofd hebbe een dag vot, dat komt d’r tevule op an. Et is zoas et is.

Vandemiddag he’k mit de laeder van et heurapperaot naor Et Vene west. Die laedet ien van de heurapperaoten soms niet op. Mar et kan ok an dat apperaot liggen. D’r is altied wat mit die dingen. Ik hebbe een lien-oplaeder mitkregen om de boel uut te testen. Et brekt me ok de hieltied meer op da’k altied allienig overal aachteran moet. Et is zoas et is.

Ik hebbe aorige reakties kregen op ‘e kollum over mien moeder die gister in de kraante ston. Ik schreef dat ik almar mit heur uut rieden mos in de auto en vreug me of as ik aanst echt niet vule meer kan as d’r dan ok iene is die wel es mit mi’j uut rieden wil in de auto. Gerda uut Surhuustervene wil dat wel. Ze mailde me in et Stellingwarfs, dat ze leerd hadde van heur vrundinne uut Oosterwoolde. Een nog vri’j jonge man uut Wolvege, die now in Portugal op vekaansie is, hadde mien kollum daor ok lezen. Hi’j wil ok wel mit me uut rieden. Dat is mooi. Gewoon even de Lendediek omme en in Ossenziel even anstikken en dan betael ik vanzels de bezine en traktere op een uutsmieter. As zoe’n jongkerel mar gien rauserd is die mit 120 op ‘e teller over de Lendediek scheuren wil. Dan gao ‘k allienig mit Gerda uut rieden.