Uut fietsen mit Douwe

Vandaege he’k mit kammeraod Douwe uut fietsen west. Hi’j het de fiets van Anke bruukt. Et leek d’r vandemorgen eerst niet op dat et een mooie fietsdag wodden zol, mar dat wodde et wel. D’r ston nog wel een stevige wiend, mar et wodde 19 graoden. Heerlik fietsweer. Dat we hebben een tocht van 56 kilemeter maekt. Eerst over De Hoeve en bi’j de Lende langes naor de Driewegsluus en doe naor Ooldemark. Daor hewwe luncht op et terras van Family en bin veerderfietst naor Blesdieke en doe naor de weg richting Stienwiekerwoold. Veur Stienwiekerwoold biwwe links ofsleugen naor Willemsoord. Van Willemsoord biwwe naor De Eese reden. We bin dwas deur de Heerlikhied fietst en binnendeur naor Wilhelminaoord gaon. En doe naor Noordwoolde. Daor hewwe wat dronken op et terras van et resteraantien dat in et oolde tramstesjon zit. Netuurlik mit wat lekkers d’r bi’j. We hebben vanzels de oolde lokemetief bekeken en slingerden daor nog mit kammeraod Harry, de veurzitter van DAN, an de praot. In et Vlechtmuseum hewwe praot mit direkteur Iwan van Nieuwenhoven. Douwe het de vitrine bekeken die de JVS schonken het. We kregen van Iwan ok de Stellingwarver versie van de audiotoer te heuren die ik inspreuken hebbe. En doe biwwe weer naor Ni’jhooltpae fietst. In de auto biwwe vervolgens naor resteraant De Koepelbos in Berkoop gaon. Daor hewwe waarm eten had. Ik hadde heerlike zalmfilet. We hadden aenlik naor Ni’jberkoop zullen te eten, mar dat is dichte. De weg is daor ofsleuten. Douwe het me nao et eten weer thuusbrocht en is doe weer naor huus in Veenwoolden gaon. Et was een mooie dag en we hebben een protte praot. Hieronder een foto die ‘k onderweg maekt hebbe. Dit is eethuus De Steen van de femilie Stroeve in Willemsoord.