Uut eten

Ik hebbe vandaege een heerlike fietstocht van 44 kilemeter maekt. Bi’j de Lende langes naor de Driewegsluus en doe over de Scheenesluus naor et bedoeninkien an de Van Helomavaort. Daor he’k wat drinken en een brotien hamburger had. Vervolgens bin ‘k deur Ooldetriene en Sunnege naor de supermark in Wolvege fietst. Daor was et festival en kermis. Meensken scheuten an een stok ielestiek de hoogte in. Vreselik. Dat kan nooit goed veur je gestel wezen. Mit de tassen vol bosschoppen bin ‘k op huus an gaon. Ik was mooi betied thuus veudat de vesite kwam: Geertje en Sieger. Ik kreeg een butengewoon mooi kedo van heur. De prachtige boeken Het vooroudergevoel. De vaderlandse geschiedenis. Mit schoeleplaeten van J. H. Isings. En ok nog Er was eens een god. Bijbelse geschiedenis. Ok mit plaeten van J. H. Isings. De boeken bin schreven deur Jan Blokker, Jan Blokker jr. en Bas Blokker. We hebben lekker buten zeten te bi’jpraoten en bin doe naor resteraant Boszicht in Ni’jberkoop gaon daor we heerlik eten hebben. Et was zodoende een blinders mooie dag. Hieronder een foto die ‘k vandemorgen vlakbi’j Kontermaans in Hooltpae an de Lende maekt hebbe. Niet allienig de meensken genieten van et ooldewievezoemertien, de koenen genieten ok.