Uut eten nao een wildeboel

Et was vandaege een wildeboel, et leup me kompleet over de hoge schoenen henne. Vandaege mos de fiets een servicebeurt hebben en krek vandaege regende et almar. Dat ikke et regenpak an en doe bin ‘k  in de stromende regen naor Wolvege reden. Daor wa’k om negen ure. Ik hebbe doe een lienfiets mitkregen. Daor bin ‘k op naor fysiosport west en doe weer deur de regen naor huus. Et was de bedoeling da’k mien eigen fiets vandemiddag weer ophaelen kon en… d’r kon vandemiddag ok een ni’je vriezer brocht wodden. Mar doe ‘k thuus was hul et rechterheurapperaot d’r mit op en doe kon ‘k weinig meer. Ik hebbe nog wel een lekker gebakkien mit Anke opeten. Zi’j maekte et huus schone en trakteerde omdat ze jaorig west was. Vandemiddag mos ik dus naor Et Vene om et heurapperaot maeken te laoten. D’r is een ni’je speaker in kommen. D’r is iederkeer wat mit… Et betekende wel da’k mien fiets niet ophaelen kon, die za’k morgen ophaelen. En de vriezer kon ok niet brocht wodden, dat zal now maendagmiddag wezen. As d’r dan niet weer wat aanders tussendeur komt. Ik kan barre min tegen al die drokte. Straks kommen Douwe en Pieter hier. Pieter is de webmaster van Douwe en mi’j. We trakteren Pieter ieder jaor op een etentien. Et iene jaor in de Stellingwarven, et aandere jaor in de buurt van Veenwoolden en De Westereen. We zullen vanaovend naor resteraant Boszicht in Ni’jberkoop. Nao een malle en vusen te roezige dag wodt de aovend grif nog wel hiel genoeglik. En dan morgen mar weer zien…