Urk

We bin d’r vandaege even tussenuut west. Niet al te veer uut de buurt, we bin naor et vroegere eilaand Urk west. Daor hewwe et museum Het Oude Raadhuis bekeken. Ik was d’r hiel lange leden es een keer west mit de Stellingwarver Schrieversronte, dat is misschien wel dattig jaor leden. Ik wus d’r dus niks meer van. Et is een hiel mooi museum mit netuurlik een protte andacht veur de klederdracht en de viskeri’je. Ie konnen in de stuurhutte van een mederne viskersboot an et roer staon. En om je henne was de zee en aandere boten en doe wodde et barre min weer mit hoge golven… Alles beweug om oons henne en et vuulde dus krek as beweugen wi’j ok. Dat was nep, mar et vuulde wel zo. Dat ik wodde d’r zuver wat zweverig van. Mar et was prachtig. Bi’j de waarme bakker he’k wat lekkers kocht en aachter de bakkeri’je hewwe in Eethuys De Oude Bakkerij wat dronken mit een lekker gebakkien d’r bi’j. We hebben ok een kuier over Urk maekt. Vervolgens hewwe een tocht deur de Noordoostpoolder maekt en we bin uuteindelik uutkommen bi’j resteraant Pieter Poot op ‘e Blesse. Daor hewwe heerlik eten had. Van Geert, een slim aorige man uut Berkoop, kregen we elk een draankien anbeuden. Donny Lawerman, de baos van ’t spul, kwam ok nog even bi’j oons taofeltien om een praotien te maeken. Et is daor gezellig en et eten is d’r heerlik! Hieronder een foto die ‘k vandemiddag maekt hebbe. Gezicht op Urk.