Twiede kastdag

De keuning hadde et d’r gister over dawwe naor mekaander ommezien moeten. Mekeer helpen moeten as dat neudig is. Daor bedoelde Willem-Alexander grif ok mit dat technische onbenullen en hampelmannen hulpen wodden moeten. Hi’j was nog mar krek uutpraot en doe belde Jarmo. Die zee dat hi’j wel even langeskommen zol om de radiators te ontlochten. Zie mien dagboekstokkien van eregister. Vandemiddag het hi’j d’r west. Et was nog een hiel gedoe dat wel twie uren duurd het. Dan mos de verwaarming weer uut en dan weer an… Omda’k nargens ok mar wat van begriepe daenk ik dan vanzels: As dat allemaole mar goed komt. Uut iene radiator kwam een protte locht, die wodde ok mar an de iene kaant waarm. Dat is now goed en alles dot et nog now Jarmo weer op huus an is. Ik zitte in een lekkere waarme kaemer. De keuning kan over oons in ieder geval tevreden wezen.

Ik hebbe een peer daegen leden 12 wat langere verhaelen, die ‘k de laeste twie jaor schreven hebbe, nog es weer lezen. Ik hebbe de laeste jaor of tiene ok nog 37 wat kottere verhaelen (zoas in De wereld is gek en Mit et waeter veur de dokter) schreven. Die lees ik now ok allegeer nog es deur en ik veraandere wat kleinigheden. Ik vien ze ok now nog hiel humoristisch. Tot now an toe in ieder geval. Ik hebbe d’r nog mar 15 lezen.