Twie recht twie averecht

Dit weekaende he’k een protte wark an een biezunder, mar nog geheim projekt. Maendag over een weke vergeerderen we daor weer over. As et wat wodt, wat nog lange niet zeker is, heuren jim d’r ongetwiefeld meer over.

Naodawwe hier gisteraovend thuus lekker eten had hebben, bin ik mit Fettje, Gerda en Jelle naor oons mfc De Ni’je Stienze gaon veur de veurstelling Gewildgroei van de kabberetgroep Twie recht twie averecht uut Willemsoord en omgeving. De vier vrouwluden, Alie Stroeve, Janet Marks, Lucia Bolding en Janet van Veen, hebben de grote zael mit volk en oons een prachtige aovend bezorgd. De kabberetgroep bestaot van ’t jaor veertig jaor en Alie Stroeve is de ienige die vanof et aldereerste begin mitspeuld het. Nao dit seizoen hoolt ze d’r mit op en dan zal ze et grif ok wel een betien missen gaon, zee ze nao ofloop tegen me. Hilarisch weren de verhaelen over de diversiteit, de vekaansie mit de camper en de drie zusters die veur de eerste keer naor de sauna gongen. Ze weren d’r van overtuugd dat et een badpakkedag was, mar dat pakte aanders uut. Dat was dus niet zo en ja, waj’ dan allemaole wel niet te zien kriegen in een sauna! We bin van doel en gao mit ’n vierend et volgende seizoen naor een optreden van Harm en Roelof in De Deel in Slien. Ik hebbe d’r now al nocht an!