Johan Veenstra
Stellingwarver schriever en verteller
Plaetst op 3 feberwaori 2025.
Gisteraovend om percies acht ure begon de klokke van oonze Nicolaaskarke te luden. Ik ston veur et raem van mien slaopkaemer te luusteren. Een goeie 200 klokken ludeden gisteraovend 18 menuten en 25 sekonden in verbaand mit de waetersnoodramp van 1825. Mar… de karkeklokke van Ni’jhooltpae hul d’r nao 12 menuten mit op. Now, toe dan mar. Et was liekewel indrokwekkend om naor te luusteren.
Vandemiddag he’k verhaelen verteld veur de leden van de bejaordesoos van Opaende oftewel in et Fries De Pein. Dat was in dörpshuus De Wringe. Et was een mooie middag, ik kon heerlik vertellen. Doe mien thriller Et liek in de Lende uutkwam he’k overal bestelde boeken rondbrocht. Ik brocht doe ok een boek naor een boerderi’je, een aentien van de weg of, in Opaende. De vrouw die et boek besteld hadde, was d’r vandemiddag ok en kwam even bi’j me. Zokke dingen vien ik mooi. Ze vertelde dat ze al mien boeken hadde.
En dan ok nog even over vleden weke vri’jdagaovend. Daor bin ‘k deur alle drokte nog niet an toekommen. De Stellingwarver Verhaele-aovend in Museum ’t Kiekhuus in Wolvege was een groot sukses. D’r kwam best wat volk op of. In drie ruumten van et museum kon d’r luusterd wodden naor schrievers-vertellers-veurlezers. Et pebliek kwam in groepen bi’j oons langes. Ik moch in ien van die ruumten vertellen mit Wiesje Mulder. Zi’j las een verhael van Jimmy Visser veur uut et boek De verhaelekoffer dat deur ’t Kiekhuus in 2023 uutgeven is. Ik hadde dat boek nog niet en hebbe et dus drekt anschaft. We hebben mit een hiel koppeltien volk nog lange naopraot. Et was een mooie aovend! Lenus van der Broek maekte onderstaonde foto. Hier bin ik an et vertellen en Wiesje zit links naost me.