Twente

Haarm en ik hadden vandaege naor kammeraod Gé in Borne/Boorn zuld. We gongen altied ien keer in et jaor naor him toe. Dat was jaorenlaank vaast pandoer. Mar… et is now al vier jaor leden dawwe d’r veur de laeste keer west hebben. Dat was in 2018. In 219 was ik niet al te goed doe we d’r henne zollen en doe kwammen d’r twie meer as vervelende coronajaoren. Mar now zol et wezen! Mar ja, mien energie is nog wel wat beparkt nao mien uutvanhuzeri’je in et ziekenhuus, dat we hebben et uutsteld tot ankem veurjaor. Dat spiet me verschrikkelik. Ik hope toch echt da’k dan es weer naor dat mooie Twente toe kan. In plak van naor Twente bin ‘k vandemiddag naor kapster Bertha in Et Vene west. Zi’j het me weer wat oppolletoerd. Veur de haorwaskeri’je en -knipperi’je he’k een koppien thee mit hunning en een plakkien eigenmaekte keek mit sjem had. En nao de haorbekubberi’je he’k daor een koppien kiepesop mit een stokkien Turks brood mit keze had. En doe nog een koppien thee mit een plakkien Drentse rezienekoeke. Heerlik!