Twente

Vandemorgen op bedde he’k de laeste verhaelen rippeteerd veur et optreden van vanaovend in ’t Centrum op ‘e Blesse. Dit is veurlopig mien laeste optreden, et volgende is op 14 juli as mien ni’je boek Naozoemerlaand uutkomt. Ik zal aanst nog even op ‘e fiets bi’j de Kuunder langes naor Berkoop om daor wat bosschoppies te doen.

En dan de mooie dag van gister… Haarm en ik bin om half negen mit mien auto votgaon en via de bakker in Berkoop en een klein schoft onderweg naor kammeraod Gé in Borne (Boorn) gaon. Daor wawwe tegen elven. Veur et eerst sund vuuf jaor! We hebben d’r eerst een peer krente-rezienepoffies oppeuzeld en bin doe op stap gaon. We bin op bezuuk gaon bi’j de Twentse schriever Gerrit Klaassen. Mit zien Marijke woont hi’j in Goor. Bi’j De Oare útjouwerij verscheen zien boek Löagn en bedröagn. We hebben et perjekt De Beumkes bekeken. Tal van bekende Twenten hebben knotwilgetoeken plaant bi’j de Regge langes in Goor. Een mooi perjekt! Vervolgens hewwe drinken en wat lekkers had bi’j Gerrit thuus en doe biwwe mit ’n vierend naor et mooie stattien Diepenheim (Deep’n) gaon dat bekend is van zien zes kestelen. We hebben daor eerst et joodse karkhof bekeken. Dat ligt wat hoge in et omringende laandschop mit iewenoolde iekenbomen. Wat een mooi plakkien! Daornao biwwe naor een aander karkhof gaon om et graf te bekieken van Antonia Cornelia Schovers (1860-1906). Tonia Schovers wodde in oktober 1906 vermoord deur de stoelematter Johannes R. Gé hadde oons dat gruwelike verhael al jaoren leden verteld. Ik zal d’r laeter in een appat dagboekstokkien meer over vertellen. We hebben ok nog een kleine kuier deur et stattien maekt en eten in resteraant Irma’s. Daor hawwe eerder op et terras al wat drinken had. En doe hewwe Gerrit weer naor Goor brocht en Gé naor Borne. Om even nao acht ure biwwe vanuut Borne vertrokken naor de Stellingwarven. We weren om tien ure weer thuus bi’j mi’j in Ni’jhooltpae en doe is Haarm naor Et Vene gaon. Et was een mooie dag mit prachtig weer en twie biezunder aorige Twentse kerels! Hieronder een foto die ‘k in Goor bi’j de Regge maekt hebbe van Gé, Gerrit en Haarm.