Tuva

Naoda’k gister overdag twie koeken bakt hadde, he’k aovens nog een griesmaelpudding kookt. We hebben vandezoemer een fietstocht maekt bi’j de zes kestelen langes om Diepenheim (Deep’n) henne. Bi’j de meule van Diepenheim he’k doe griesmael kocht en daor maek ik dus heerlike pudding van en ik doe d’r rezienen heurhenne. Omda’k de smaek te pakken hebbe, he’k vandaege nog twaelf portugesies bakt. Dat bin lekkere koekies!

Ik hebbe de thriller Tuva/De Jacht lezen, et debuut van Will Dean. Et is een mooi en spannend boek. Tuva Moodyson is een dove verslaggever van een Zweeds kraantien in et kleine stattien Gavrik. Diepe in de bossen wo’n twie lichems ontdekt. De ogen bin d’r uuthaeld. Twintig jaor leden is d’r ok zoe’n soort moord pleegd. Vermoedelik deur dezelde daoder. Kan Tuva de moordener vienen en op et spoor kommen? Om dat te kunnen moet ze heur eigen benauwdhied overwinnen en allienig, as et roetduuster is, diepe de bossen intrekken. Mar et lokt heur vanzels wel, aanders was d’r niks an et boek.