Johan Veenstra
Stellingwarver schriever en verteller

Tuunmannen

Plaetst op 18 jannewaori 2023.

Gisteraovend he’k naor de film In the valley of Elah keken. Ik hadde him wel eerder zien. Een schitterende film. As ex-militair Hank Deerfield heurt dat zien zeune Mike, naodat hi’j weerommekommen is uut Irak, verdwenen is gaot hi’j op onderzuuk uut. Hi’j vint wat gruweliks. Een film over de verschrikkings van de oorlog. Op et laeste hangt Hank de Amerikaanse vlagge ondersteboven. Die symboliek kennen we hier ok wel. Een prachtige rolle van Tommy Lee Jones as Hank Deerfield.

Vandaege en morgen he’k de beide tuunmannen Rino en Arnaud om de deure. Et schut tussen mi’j en de buren is van ellende in mekeer zakt. Et wodde allienig nog een betien in de hoogte hullen deur de klimop. Ze zetten daor dus een ni’j schut henne. Dat betekent een protte drokte. Ik zorge morgens en middags veur koffie mit wat lekkers d’r bi’j en tussen de middag veur drinken en soep. Ik hebbe een panne soep klaormaekt veur disse beide daegen. Vandaege wa’k thuus, morgen he’k zowel morgens as middags ofspraoken. Ik zette morgenvroeg alles klaor en dan kun de mannen heur wel redden. Tussen de middag kan ‘k nog een half uurtien thuus wezen. Ik zal vanaovend vot te vertellen naor de Vrouwen van Nu in et Keunstkef√© in Appelsche. Ik bin mar liefst zes keer eerder bi’j heur west te vertellen. Ik vertelle daoromme ok wel es wat verhaelen die ‘k daor in 1995 en 2007 ok verteld hebbe. Ik hope mar dat ze daor niet al te vule meer van weten.