Tuunmannen

Veur de eerste keer dit jaor bin de beide tuunmannen, Arnoud en Jaap, d’r weer west. Ze hadden disse keer een stageloper uut De Blesse bi’j heur. Ze bin d’r een weke of wat eerder as in veurige jaoren. D’r is zoe’n eerste keer altied een protte wark, dat ze bin d’r van acht ure vandemorgen tot kwat over twieje vandemiddag west. Mar now zicht et d’r ok hatstikke netties uut om huus henne. Ze hebben vandemorgen koffie bi’j me dronken mit wat lekkers d’r bi’j en tussen de middag hebben ze hier in de keuken heur brood opeten. Ik hadde een pannegien champignonssoep veur heur klaormaekt en ok wat drinkyoghurt veur heur en echte yoghurt van de biologische kezeboerderi’je Langelaan van Blesdieke. Et gong d’r allegeer best in. Ik bin wies mit die mannen die al dat wark veur me doen, dat ik moet ze goed behaandelen as ze hier over de heerd binnen.

Vandemorgen heb ik een kollum nog wat befiekt en veraanderd en doe naor de kraante stuurd. Et gaot over de sjerpslikkeri’je en ploemstriekeri’je mit Trump om die et mar naor de zin te doen en naor de mond te praoten. In disse kollum krigt hi’j een Stellingwarver op vesite. Die zit dan op dezelde stoel as waor Zelensky op zat. En die Stellingwarver pakt him an en niet zunig ok. Wie die Stellingwarver is? Et staot deensdag in de kraante.

Ooit was Amerike de grootste demekraosie van oonze vri’je westerse wereld. Wie hadde daenken kund dat et zo vlogge veraanderen kon. Et laand is onderweg naor een diktatuur, vri’jheden wo’n beknot. Et ooit zo trotse Vri’jhiedsbeeld is al boeid ofvoerd deur de pelisie.