Tuunman en tuunvrouw

Ik vale zo now en dan op ‘e stoel in de slaop. Dat is oolderdom. Gisteraovend tussen acht en negen ure ok en doe gong inienend de tillefoon. Wat krieg ik soms wonderlike tillefoonties. Een man vreug me as ik de schriever was van een verhael dat in de zeuventiger of tachtiger jaoren van de veurige ieuw in de kraante staon hadde. Een verhael in et Stellingwarfs dat in de buurt van Stienwiek speulde. Et gong over een jongkerel die van Hendrik hiette en over een boer die dood op ‘e dongbult lag. Ik hadde waorlik gien flauw idee. Een boer die dood op ‘e dongbult ligt… Dat zol et begin van een prachtige plattelaansthriller wezen kunnen. Wat zo’k et mooi vienen as een aandere Stellingwarver schriever ok es een thriller schrieven zol. Dit is dus een mooi begin. Ik hebbe ondaanks die dooie boer goed slaopen.

Vandemorgen om goed acht ure wa’k al op ‘e fiets in Wolvege. Doe ston d’r een frisse wiend. Op ‘e mark he’k een flut erebeien kocht en daor he’k vandemiddag vuuf potten sjem van maekt. Ik hadde nog  geleisuker van vleden jaor staon. Zol zoks nog wel goed warken? Et liekt me haost toe dat de sjem wat te dunne blift. Now ja, dan doe ‘k et nog een keer over. Ik wil niet dat dat spul me van de bolle ofdrift. Vandaege is de tuun ok hielemaole mooi opredded deur Rino en Andrea. Een tuunman en een tuunvrouw. Op et plak van de toverhaezelneute die dood gaon is, hebben ze een roodbluuiende camelia oftewel Japanse roze plaant. Veerderop in de tuun he’k ok iene staon die op et ogenblik prachtig bluuit. Ze hebben hier tussen de middag heur broggien opeten en ik hadde champignonssoep, frisdraank en drinkyoghurt veur heur. Zokke meensken bin goold weerd veur mi’j. As die et wark niet doen zollen, zo’k hier niet wonen blieven kunnen. Want et komt mi’j te vule op ‘e kroppe van de blaoze an.

Vandaege kwam d’r een kaorte van Harry en Frans vanuut et Jopie Huusman Museum in Workum. D’r is daor op et ogenblik een tentoonstelling mit wark van Kenne Gregoire. Op ‘e kaorte staot die zien schilderi’je Aperitief uut 2007.