Tuundorado

En altied mar weer zeg en schrief ik dawwe naor Tuundorama west hebben. Et is dus Tuundorado. Dat wodt me ok almar deur meerdere meensken zegd. Mar et is gewoon verkeerd in mien bestaand (hassens) opsleugen. En hael dat d’r mar weer es uut. Et is een toer om een oolde hond et blaffen te leren. Ik vien et trouwens beide wel mooie naemen.

Vandaege het Jaap de tuunman hier west om de boel om huus henne op te redden. Hi’j het ok even wat tietelozebollen van Tuundorado veur me plaant. Tussen de middag het hi’j hier zien broggien opeten en ik hadde een pannegien mit poddestoelesoep klaormaekt. Ik hebbe vandemiddag de verhaelen rippeteerd die ‘k vanaovend vertellen zal op ‘e Stellingwarver Aovend in et Theater oftewel de Karke op ‘e Hoogte in Wolvege. Ik hope dat et me goed ofgaon zal. Veur verschillende meensken zullen et wel bekende verhaelen wezen, mar ik lere gien ni’je verhaelen meer uut et heufd. Zo vaeke hoef ik niet meer vot te vertellen, ik bin ok wat dat anbelangt zowat op et aende van de rit, en dan is dat gewoon te vule wark. Wa’k ooit allemaole uut et heufd leerd hebbe, hool ik bi’j deur almar te rippeteren. Dat is al wark zat.

Jan en Diana appten me dat ze vandeweke op vekaansie binnen in een hotel in Noordwiek. Ze stuurden foto’s mit. Hier de zee bi’j Noordwiek. De oneindig grote zee.