Turfgrever

Et was gister een mooie aovend in Willemsoord. Ik wus niet dat Abel, Lammy en ik daor ok miteten mochten. Dat was dus wel zo en we hebben heerlik eten en… optreden. Ik hebbe begrepen dat ze daor vaeker een streektaeldiner holen zullen en dat liekt me een goed idee toe.

Vandemiddag he’k op jaordagsvesite west in Et Vene bi’j Haarm en Jacob. Ik hebbe Haarm fielseteerd mit et vermeerderen van jaoren. We hebben daor een genoeglike middag had mit lekkere happies en draankies. Ik bin betied weer votgaon, want ik kreeg vanaovend een eter. Jarmo het hier eten. Ik hadde gister al huspot klaormaekt en die is d’r goed ingaon en de gelderse wost ok. Now ja, zoe’n jonge kerel et vanzels as een turfgrever. Morgenvroeg za’k een beste flut stamppot zoerkool, weer mit gelderse wost, toemaeken. Want morgenaovend komt hi’j weer te eten. Zien oolden bin op vekaansie in Spanje en die laoten zoe’n jonge dan allienig in Wolvege aachter. En wat komt d’r dan van de eteri’je terechte aj’ ok nog een bedrief hebben daor aj’ daegs wezen moeten? Niks. Dan is et dus een zegen dat hi’j mi’j kent en dat hi’j in Ni’jhooltpae een fesoenlik bod waarm eten kriegen kan. En… ik vien et hiel gezellig as hi’j komt!