Tropisch

Vandaege is et hier tropisch en zal et 37 graoden wodden. Aj’ niet beslist de diek uut moeten, kuj’ beter thuus blieven. Dat doe ik dus. Ik hebbe alles wa’k doen zol schrapt. Ik bin dus vandaege niet naor fysiosport en de kapper. Et is hier in huus prima uut te holen. Et is now, vandemiddag om twie ure, in de kaemer 24,5 graoden.

En dan nog even over gister… Ik hebbe ondaanks de temperetuur van 33 graoden een genoeglike dag in de Aachterhoeke had. Diana hadde lekker gebak in huus haeld. Daor he’k morgens een hiempe van had. We hebben gezellig bi’jpraot. Tussen de middag he’k bi’j heur soep en bolle had. Zeune Leon kwam ok even miteten. Middags biwwe in de auto naor kesteel Slangenburg in Doetinchem west. Et ooldste stok van et kesteel dateert uut 1609. Om half drieje hawwe daor een rondleiding. De man die oons rondleidde vertelde d’r hiel mooi over. Et is een mooi kesteel dat stokkien veur stokkien restereerd wodt. Op et ogenblik wodt de grote zael onder hanen neumen. D’r hangen prachtige schilderi’jen en de zoolderings bin ok prachtig beschilderd. Vaeke mit ofbeeldings uut de mythologie. Zoas de bekende verhaelen over Leda en de zwan en Paris en de goolden appel. Dat spul moet aenlik allemaole schonemaekt wodden. Wat een wark… Nao de bezichtiging van Slangenburg hewwe nog een rittien in de omgeving maekt. We hebben veur de Sunte Willibrordusabdij staon. Daor wonen Benediktijner monniken. Mar ie kun d’r ok wel een dag of wat uutvanhuzen. We hebben de Antoniuskapel in Sinderen ok van buten bekeken. Daor ston al een kapel in 1150. Die is in 1660 deur de bliksem troffen en is doe van stien weer opbouwd. Et was de bidkapel van de Heren van Sinderen. Die woonden daor vlakbi’j op een wit kesteel dat om 1876 henne ofbreuken is. De stienen bin bruukt veur et bouwen van twie boerderi’jen. Dat zodoende staon daor now twie witte boerderi’jen. We hebben gisteraovend heerlik eten in resteraant Het Noorden. Ik hebbe lekkere zalmfilet had en een overheerlike cheesecake mit daank an kok Robin. Zoks hiet in et Stellingwarfs vanzels kezekeek. Om half 8 bin ‘k in Aalten weer in de auto stapt nao een mooie en waarme dag. Jan en Diana kommen in september bi’j mi’j op vesite. Ik mag hopen dat et dan wat minder waarm is. Hieronder nog twie foto’s die ‘k maekt hebbe. Omdat et kesteel in et schaad lag was daor gien mooie foto van te maeken. Boven: de Sunte Willibrordusabdij in Doetinchem. Onder: de Antoniuskapel in Sinderen.