Trein-ellende

Vandemorgen he’k naor fysiosport in Wolvege west. Ze hebben vier van de negen toestellen wat zwaorder ofsteld en dat was te marken. Et komt now meer op ‘e huud an. Daornao wa’k van doel en gao mit de trein naor Zwolle, want ik wol daor graeg de tentoonstelling Thuis bij Ter Borch bekieken. Een tentoonstelling over de bekende keunstenersfemilie in de zeuventiende ieuw. Mar ik bin nooit in Zwolle kommen. Ik hadde nog zeker drie keuzedaegen te verbruken, mar et apperaot op et stesjon  gaf an dat d’r gien keuzedag veur me klaorston. Ik bin naor huus gaon en hebbe kontakt perberen te kriegen om te vraogen hoe dat kon. Eerst kreeg ik een chatbot (hiet dat zo?). Die kon ik een vraoge stellen. Mar die wus et niet en ik kreeg bericht dat et slimme drok was. Over twintig menuten wodde kontakt mit me opneumen deur een echte mitwarker. Dat gebeurde. Ik kreeg al chattende kontakt mit een vrouw. Die bekeek de boel en zee dat ze de daegen opni’j op ‘e kaorte zet had. Now mos et lokken en as et ooit niet lokte mos ik et nommer bellen dat op et apperaot op et stesjon staot. Ik besleut asnog naor Zwolle te gaon. Mar d’r ston in Wolvege gien keuzedag veur me klaor. Ik hebbe dat nommer van de klaantedienst beld. Een vrouw keek et nao. Ze kon zien wat ik dee, we hebben oefend. Mar et wol niet. Ze wus et veerder ok niet en zol me deurverbienen. Mar d’r kwam gieniene meer an de tillefoon. Ik ston daor mar in de koolde en hebbe weer beld. Mit dat vrommes he’k ok oefend, mar zi’j wus et veerder ok niet. Ik mos dat nommer mar weer bellen en dan vraogen as et apperaot op et stesjon misschien kepot was. Ik hebbe weer beld. Een man zee dat et perbleem was dat mien keuzedaegen wel op mien kaorte staon, mar dat ze niet deurgeven binnen an et apperaot op et stesjon. Dat zullen ze verhelpen. Ik kriege een mailtien as et weer klaor is. Dat kan wel een peer daegen duren. Ik hebbe d’r now trouwens hielemaole gien vertrouwen meer in. Ik zal et even ofwaachten en a’k niks heure za’k weer bellen. Lokt et dan nog niet, dan stop ik mit de hiele boel en gao ‘k gewoon niet meer mit de trein vot. Wat een ellende. En dan dat gebel in de koolde bi’j dat stesjon. Leve de NS!

Hieronder nog een foto van gister: de flamingo’s in de Orchidenenhoeve in Luttelgeest.