Toch nog weer et waeter op

Vleden weke docht ik dat et doe lichtkaans de laeste keer west was dawwe mit de boot et waeter op west hadden. Mar dat was dus niet zo. We bin vandaege ok de hiele dag op et waeter west. Van vandemorgen half elven tot vanaovend zes ure. Vandemorgen was de zunne d’r niet zo vaeke bi’j en was de wiend best wel wat kil. Een jasse an was doe beslist gien overbodige luxe. Vandemiddag was et heerlik weer en leup de temperetuur mit volop zunne op naor 21 graoden. Krek as de veurige twie weken hewwe eten op et terras van hotel-resteraant Ie-Sicht. Dat ligt haost altied lekker in de li’jte. Ankem weke zien we wel weer… Wat mi’j anbelangt mag et tot de kastdaegen wel goed 20 graoden blieven. Hieronder twie foto’s van vandaege. Boven: dit is et huus mit et grune dak in Eernewoolde. Hier veren we vaeke veur langes. Et is zodoende een baoken tiedens oonze boottochten. Onder: een locht vol wolkens boven et waeter even veurbi’j et huus mit et grune dak.