Thuis bij Ter Borch

Dit is een vervolg op et dagboekstokkien van vleden weke vri’jdag… Maendag kwam d’r inderdaod een mail van de NS mit de tiedinge dat d’r now toch echt een keuzedag veur me klaorston. En dat klopte, ik kon vandemorgen weer mit de trein! Dat ik bin asnog naor Zwolle gaon en hebbe daor in Museum De Fundatie de tentoonstelling Thuis bij Ter Borch mit groot genoegen bekeken. De femilie Ter Borch was een bekende Zwolse keunstenersfemilie in de zeuventiende ieuw. De bekendste is Gerard ter Borch de Jonge (1617-1681) wodden. Mar zien breurs en zusters schilderden en tekenden ok. Heur vader Gerard ter Borch de Oolde kon d’r ok wel wat van en brocht et zien kiender bi’j. Nao 400 jaor bin schilderi’jen en tekenings van de femilie van over de hiele wereld weer naor Zwolle, naor huus, kommen veur disse biezundere tentoonstelling die een schoffien leden eupend wodde deur keuning Willem-Alexander. Van alle femilieleden is d’r wark te zien. Prachtige schilderi’jen, mar ok tekenings die et leven op ‘e straote in Zwolle en op et ies in die tied zien laoten. Hiel mooi allemaole. Soms warkten Gerard en zien zuster Gesina beidend an etzelde schilderi’je. Gerard gong naor een schilder in Londen om et vak goed te leren. D’r is een brief beweerd bleven die zien vader him stuurde. Hi’j mos flink zien best doen en him netties gedregen! Naoda’k de tentoonstelling bekeken hadde, he’k wat eten (een lekker brotien bienschinke) in resteraant Ensemble tegenover et museum. In Wolvege he’k laeter nog even op vesite west bi’j Gooitske. Dat wodde ok wel weer es tied. We hebben uutgebreid bi’jpraot. Hieronder nog twie foto’s. Boven: et schilderi’je De Briefschrijfster van Gerard ter Borch de Jonge dat now in Zwolle te zien is. An wie zol ze die brief schrieven? An heur omke en mujke in Batavia of… an een glundige en knappe ritmeester die heur vader weten laoten het dat hi’j heur wel graeg hebben wil? Ik daenke en hope et laeste. Onder: et was mooi zunnig weer in Zwolle, dat ik hebbe de Peperbusse mar even op petret zet.