Thriller

Ik wodde vandemorgen om half 9 beld deur een man en die zee: ‘We stappen now in de auto.’ Ik hebbe nao die tiedinge de tillefoon daelelegd en et pakkien pakt dat in de hal al klaor lag en doe bin ik mit et pakkien ok in de auto stapt. Een kertier laeter wa’k op et parkeerterrein van Van der Valk in Wolvege. Even laeter kwam d’r een donkerrooie auto anrieden mit een man en een vrouw d’r in. Hadde de vrouw een zunnebrille op? De man en ik stapten uut oonze auto’s, zi’j bleef zitten. Ik hebbe de man et pakkien geven. Vervolgens bin zi’j votreden en de snelweg opgaon en ik bin weer naor huus gaon. Dit gebeurde allemaole vlakbi’j de hotelkaemer onder in et Van der Valkhotel daor Mara Silvius en rechercheur Rik Smit een wilde naacht beleefden in et begin van de thriller Et liek in de Lende. Was dit vandemorgen et begin van een ni’je thriller? Wat zat d’r in dat pakkien? Drugs? Geld? Een pistool om iene mit dood te schieten? Weren die man en de vrouw in de donkerrooie auto drugskoeriers? Lichtkaans huurmoordeners? Nee… In de auto zatten Jelle en Gerda uut Sneek die onderweg weren naor Rinke en Jellie in Oss. En die hadden mien ni’je verhaelebundel Naozoemerlaand besteld en dat nammen Jelle en Gerda dus veur heur mit.