The Leiden Collection

Ik bin vandemorgen om half tiene in Wolvege in de trein stapt en vandaege naor Amsterdam west. Daor he’k op mien vaaste adres, et Ni’je Kefé naost de Ni’je Karke, eerst wat drinken en een tosti keze/schinke had. Vervolgens bin ‘k naor Museum Hermitage an de Amstel kuierd. Veur de coronapandemie kwam ik elk jaor wel in dat museum. Daor hadden ze altied prachtige tentoonstellings mit spul van de tsaren uut de echte Hermitage in Sunt Petersburg. Et vroegere winterpeleis van de tsaren. Mar naodat Ruslaand een oorlog mit Oekraïne begon, bin alle betrekkings tussen de beide museums stopzet. Now bin d’r dus aandere tentoonstellings, mar wel lieke mooi. Ik hebbe vandaege Rembrandt & tijdgenoten bekeken. Historiestukken uit The Leiden Collection. Schitterend! Mythologische, biebelse en allegorische verhaelen. Schilderi’jen van Rembrandt van Rijn, Ferdinand Bol, Carel Fabritius, Frans van Mieris, Jan Steen, Pieter Lastman (de leermeester van Rembrandt) en nog een protte aanderen. D’r hangen mit mekeer 35 schilderi’jen uut de privé-verzaemeling van dr. Thomas S. Kaplan en zien vrouw. Zi’j verzaemelen oolde Nederlaanse Meesters uut de tied van Rembrandt. Vaeke van schilders die in Leiden woonden of woond hebben. Vandaor de naeme The Leiden Collection. Wat moej’ allemachtige riek wezen aj’ Hollaanse Meesters verzaemelen kunnen! Mar Kaplan en de vrouw holen al dat moois niet allienig mar veur heurzels. Ze reizen d’r mit over de wereld, zodat iederiene et zien kan: Peries, Berlien, Peking, Shanghai, Moskou, Sunt Petersburg, Abu Dabi en now dus in Amsterdam. In et laand waor al die schilderi’jen indertied schilderd binnen. Dat is toch wel hiel biezunder. Hieronder een foto van Museum Hermitage.