Tekening

Vandemorgen kree’k een man uut et dörp an de deure die van oorsprong van Gersloot komt. Hi’j hadde een kedogien veur me. Kunde van him, Jan Dijkstra uut Luunberd, hadde mi’j jaoren leden tekend naor anleiding van een foto van me in een kraante of tiedschrift. En now moch ik die mooie tekening hebben. Ik herkende mezels drekt. Mar op die tekening heb ik nog een baord. De tekening stamt dus uut de veurige ieuw, want sund 30 december 1999 heb ik gien baord meer. Dat ik die daotum zo percies wete, komt vanzels argens deur. Mar et is een mooi kedogien en ik zal zorgen dat de tekening in et archief van de Stellingwarver Schrieversronte kommen zal. Dan blift et goed beweerd! Nao de vri’je dag van gister he’k vandemiddag weer boeken verkocht in Berkoop. Et was drok en ik hebbe best verkocht. A’k veur zestig centen meer verkocht hadde, was et een ni’j verkooprekord west. Mar och, ie kun niet alles hebben.

Hieronder nog twie foto’s van de mooie boottocht van gister. Boven: een dustige koe bi’j Broek onder De Jouwer zocht et waeter op. Onder: hier en daor weren onderweg lesboties op et waeter.