Tael an Taofel

Et was heerlik om vandaege weer vertellen te kunnen. Ik hadde goed oefend en kon de verhaelen zonder ok mar iene haepering vertellen. Eerst dan bin ik tevreden. Ik moch vandaege mitdoen an Tael an Taofel in de zael van Zwaneveld in Norg. Dat moch ik doen mit Sylvia Fledderus en Harma de Roo. Harma las mooi veur in et Westerwooldse Grunningers en Sylvia zong in et Veenkloniaolster Grunningers. Ze zong op blote voeten. Ik mos drekt an Sandy Shaw daenken. Die Britse zangeresse wun in 1967 et Eurovisie Songfestival mit et lietien Puppet on a string op blote voeten. Mar ja, wie kent de naeme Sandy Shaw nog? Ze is laeter trouwens boeddhist wodden, mar dat zal grif niet deur die blote voeten kommen wezen. De zael van Zwaneveld zat mit zoe’n goeie zestig meensken mooi vol. Tael an Taofel bestaot sund 1993 en et is en blift een mooie formule. Twie blokkies mit optredens en tussendeur mit iederiene eten. We kregen een twaelfuurtien. Een koppien gruunte- of mosterdsoep, een plakkien bolle mit keze/schinke en een bakt ei en een plakkien bolle mit een kroket. Et was mooi dat de vader en moeder van Abel d’r weren. En Geeske  was d’r ok. Mit heur zat ik eertieds op ‘e ulo in Wolvege. Ze woonde an de Van Nijmegen Schonegevelstraote, dat was vlakbi’j de ulo. Laeter het ze jaoren in Spanje woond en now woont ze in Norg en is ze bevrund mit Harry en Frans uut Noordwoolde. En zo is de cirkel mooi rond. Hieronder een foto die ‘k vandemorgen maekt hebbe van kefé Zwaneveld. Half in de zunne en half in et schaad. Et was schitterend weer vandaege. Et terras van Zwaneveld zat vandemiddag hatstikke vol.