’t Maotie

Gisteraovend begon op NPO 3 de prachtige Britse misdaodserie Deceit. Een jonge moeder is in een park doodsteuken. De vermoedelike moordener is Colin Stagg. Mar bewies dat mar es… Agent Sadie Byrne, die speuld wodt deur Niamh Algar, gaot undercover en perbeert Stagg an de moord te koppelen. Dit wodt de kommende zaoterdagsaovens enorm genieten. En moch et al es wat bloederig wodden, dan hool ik gewoon even een haand veur de ogen.

Veurdat corona begon gong ik winters altied mit Fettje naor veurstellings in pannekoekboerderi’je ’t Maotie in Gasselte. Daor weren zundagsmorgens vaeke streektaelartiesten te zien en te beluusteren. Dat now hawwe vandaege naor een optreden van de Drentse schriever Jans Polling zuld. Doe ik mien stiekelstokkies op Omroep Frieslaand vertelde, vertelde Jans wekeliks verhaelties (meerst over zien huusholing) op Radio Drenthe. Ik hebbe alle boeken van Jans in de boekekaaste staon. Wat hawwe d’r een nocht an en gao daor vandemorgen henne, mar… et is niet deurgaon. Jans kon vanwege hiele malle femilieomstaandigheden niet kommen. Jans en ik bin van dezelde leeftied en ik mos onwillekeurig an een Twents spreekwoord daenken: Komt de tied, dan komt de plaoge. Dat ja, zodoende kon ‘k wel zien hoe as oonze shorttracksters goold wunnen! Wat was dat een geweldige rees!

Ik hebbe et boekien Over mijn katten van Renate Rubinstein (1929-1990) lezen. Onder et pseudoniem Tamar schreef ze indertied verhaelen in Vri’j Nederlaand. De katteverhaelen bin in 1989 bundeld in Over mijn katten. Et bin slim vermaekelike verhaelen. Ik zat iederkeer te gniezen. Want ja, ik herkende et gedrag van mien alderliefste poes Marja mar al te goed.