’t Maotie

Gister kwam et kulturele winterpergramme van ’t Maotie in Gasselte over de post. Fettje en ik gaon daor ieder jaor naor een optreden van et Drentse kabberetduo Harm en Roelof. Omdawwe gister mit een boottocht vot weren, kon ‘k doe niet drekt bellen. Vandaege dee blieken dat heur eerste optreden op 9 november al volboekt is. Gelokkig treden de beide mannen wel vier keer op in ’t Maotie, dat we zullen now op 22 meert naor heur toe. Dat duurt dus nog een schoffien. Ik hope dawwe d’r dan nog een betien gezond henne kunnen… De laeste weke kree’k weer de meerst aekelike dingen te heuren van en over meensken die a’k kenne. Carpe Diem.

Vandemorgen he’k in de auto naor fysiosport in Wolvege west. De buierader leut zien dat d’r vandemorgen malle bujjen kommen zollen, daoromme gong ik mar niet op ‘e fiets. Waoromme zuj’ je nat regenen laoten? Mar d’r kwammen gien malle bujjen, et was mooi en zunnig weer. Wat een flutveurspelling.

D’r kwam vandeweke een kaorte van Haarm en Jacob uut et mooie Schoorl. Ze zitten/zatten in een vekaansiehusien in Groet. Mids juli hebben wi’j daor nog een heerlike fietstocht van een goeie zestig kilemeter maekt.