Sytze en Bertha

Gisteraovend kreeg ik tillefoon van Sytze, de zeune van Lammert en Meta. Hi’j was gister mit de auto naor Noordwoolde reden en daor an een kuiertocht van 40 kilemeter begonnen. Zoks dot hi’j vaeke. Eerst over Steggerde naor Wolvege en doe naor Hooltpae en Ni’jhooltpae. Doe hadde hi’j al een stokmennig regen-, haegel-, en natte sni’jbujjen op ‘e huud kregen. Dat hi’j kwam bi’j mi’j an om him wat op te waarmen. Mar ik was niet thuus. Doe hi’j deur et raem keek zag hi’j een zwat/witte poes op ‘e baank liggen. En doe is hi’j koold en nat veerderlopen over Berkoop, Buil en De Oosterstreek weer naor Noordwoolde. Wat een vreselike tocht. Doe ik thuuskwam lag die zwat/witte poes nog altied op ‘e baank. Nao et bekieken van  de schilderi’jen in et Grunninger Museum zag ik gisteraovend et laeste diel van de zuuktocht van Jeroen Krabbé naor Henri Matisse. Wat was dat een prachtige serie. Ik hebbe me hielemaole mitnemen laoten deur Krabbé deur et soms zo tragische leven van de bekende schilder.

Nao een bespreking in et gebouw van de Stellingwarver Schrieversronte he’k vandemiddag veur de laeste keer dit jaor naor kapster Bertha in Et Vene west. Ik hebbe eerst een bakkien thee mit een stokkien rezienebolle mit botter had. Vervolgens het ze een ure tied had en maek me weer wat toonber. En doe kreeg ik een koppien tomate/gruuntesoep en twie plakkies bolle, de iene mit geitekeze en et aandere mit schaopekeze. Heerlik! Ik hope ankem jaor mit weer genoegen naor heur toe gaon te kunnen.