Sutelen

Gisteraovend is d’r suteld in Appelsche en Oosterwoolde. D’r weren acht krojen bi’j de weg en d’r is veur ongeveer 1100 euro verkocht. Ik hebbe in Appelsche suteld, an weerskaanten van de Vaort. De locht begon op een gegeven ogenblik almar donkerder te wodden en et begon wat te spatteren, mar echt hinder he’k d’r niet van had. D’r was zodoende wel een schitterende regenboge an de locht te zien. Et was al haost donker doe een vrouw op een fiets bi’j me stopte. Ze vreug a’k ok nog bi’j heur in de straote kwam, mar dat was niet et geval. Ie kun in donker niet meer bi’j meensken an de deure kommen. Ze zee dat ze de boeken van Johan Veenstra altied las. Ik vertelde dat Naozoemerlaand een ni’j boek van him was. Ze keek me verbaosd an. ‘Leeft die man dan nog?’ vreug ze. Now ja, nog al dus en hi’j sutelt van ’t jaor ok nog mit.

Veur de meensken die de petitie veur et Nedersaksisch en et Limburgs nog niet tekend hebben. Et zol mooi wezen as d’r ok flink wat meensken uut de Stellingwarven tekenen! Zie http://erkenregiotalen.petities.nl