Sutelaktie

Nao een enorme onweersbujje is de 50^ste sutelaktie vanaovend uut aende gaon. Henk en Annie sutelen hier in Ni’jhooltpae, de kroje ston bi’j mien huus. Et was de bedoeling da’k disse sutelaktie nog twie keer mitdoen zol. Iene aanders wol wel krojen, dan hoefde ‘k dat niet te doen. Mar ja, doe kwam ik weer in et ziekenhuus terechte. Et is verstaandiger da’k et niet meer doe. Mar veur mien gevuul moet ik mitdoen. Et was altied mien lust en mien leven. Weken van teveuren zat ik al over et weer in. As et mar niet regende… De aldereerste keer wa’k d’r al bi’j, dan heurde ik de 50^ste keer d’r vanzels ok bi’j te wezen. Ik hadde d’r now trouwens echt tegenop zien. Mar wat was et altied mooi. Ik hebbe 47 keer mitsuteld en dan keers ok haost alle daegen/aovens. Vroeger sutelden we drie hiele daegen in de eerste weke van oktober. En dan tussen de middag eten bi’j Jan Dragt in Wolvege of bi’j De Zon in Oosterwoolde of argens in Noordwoolde. Wat was me dat een feest en een saemheurighied. En dan mit wel twaelf krojen of nog wat meer bi’j de diek. En dan alle verhaelen nao ofloop en de centen tellen! Vanaovend bin ze mit vuuf krojen op pad. Et dot zeer om dit loslaoten te moeten. Twie jaor leden he’k veur de laeste keer suteld. Ik hebbe et tot mien 77^ste volhullen. D’r is gieniene die zovule suteld het as ik daon hebbe.

Wat wel mooi is, is dat binnen een weke nao de medische keuring, d’r al bericht van et CBR kommen is da’k bi’j de gemiente een ni’j riebewies anvraogen kan. Dat is een hiele stiekel uut de voete. Ik hadde Karel en Annie uut et Braobaanse Zeelaand om disse tied henne op vesite hebben zuld, mar Karel belde vandemorgen dat zien ogen te min binnen. Hi’j mag niet meer autorieden. Dat is een enorme beparking. Dat mag ik gelokkig nog wel even deurdoen.