Sutelaktie uut aende

Op et ogenblik dat ik dit stokkien schrieve, gaon de sutelders de weg uut mit krojen vol boeken. De 49^ste Stellingwarver sutelaktie is uut aende zet en ik bin d’r niet bi’j. Daor daenk ik de hiele dag al an, want ik heure d’r wel bi’j te wezen. Van de 48 sutelakties die west binnen he’k 45 keer mitdaon en dan ok praktisch alle keren. Drie keer kon ik niet mitdoen in verbaand mit ziekte van mien moeder of mezels. Ik hebbe dus 45 keer 6 dagdielen suteld en allienig op die meniere grif wel veur een 50.000 euro verkocht. Ik hebbe tussen 4 en 5 ure almar docht van wat ze in Berkoop an et doen weren. De schaolen brune en witte bolties en de stokkies sukerbolle soldaot maeken. De genoeglike praot. Et je inzetten veur een goed doel. Et blaozen op ‘e suteltoeter. Et dot zuver zeer om niet mit te doen. Et vuult as een nederlaoge. Mar et komt me d’r zo staorigan te vule op an. Mit zwaore bakken vol boeken ommesjouwen, een aovend krojen en bi’j de diek ommebeinselen… Dat wodt me te vule. Mar dat vuult dus hielemaole niet goed, want zo brokkelt de boel dus of. Dan kuj’ dit niet meer en dan kuj’ dat niet meer. En daor walg ik dus van. Ze hebben op disse eerste sutelaovend prachtig sutelweer zo et liekt, alhoewel d’r now krek een bujgien is, en ik hope dat d’r ok nog een peer boeken van disse oolde sutelder verkocht wodden. Gieniene het zovaeke suteld as ik in mien leven daon hebbe. Et was mien lust en mien leven. Ik bin de eerste keer begonnen in Appelsche en vleden jaor he’k op ‘e laeste aovend ok weer in Appelsche suteld. En doe was, zonder da’k d’r doe arg in hadde, de cirkel rond.