Sunte Matten

Vandemorgen hebben de beide tuunmannen Rino en Arnoud alles om huus henne netties maekt. Ze hebben d’r ok wat ni’j kattekruud bi’j plaant, een pat was naemelik doodgaon. Butendat hebben ze wat lavendel veur ’t huus plaant. De vrouwemaantel die daor ston is in de hitte van vandezoemer doodgaon. Lavendel kan beter tegen de waarmte. Vandaor. Ze kommen now nog ien keer dit jaor. In december redden ze altied hiele flutten blad op. Vandemiddag het Anke de boel in huus weer netties maekt, dat now is alles in en om huus weer mooi. En vanaovend kommen de kiender mit lampions an de deure, want et is Sunte Matten. Dat oolde gebruuk bestaot gelokkig nog. Alhoewel ze niet meer in et Stellingwarfs zingen zoas wi’j vroeger deden en ze hebben ok gien echte keersies meer in de lampions. Dat vien ik jammer. Mar ja, niks blift veur iewig etzelde.
Hieronder nog een foto van poes Marja, die ‘k vandemorgen maekt hebbe. Poes ligt vaeke op een dekentien op ‘e baank in de kaemer. Mar now hadde hi’j et zo veur mekeer kregen dat hi’j op en onder dat dekentien lag. Poes Marja is een slim schraandere poes. D’r lag vandemorgen doe ‘k van bedde kwam trouwens wel weer een vervreten moes in de hal…