Sunte Matten
Plaetst op 11 november 2025.
Vandaege het Anke alle raemen an binder- en buterkaant schonemaekt. Ik kan alle schuldeisers now weer anzien kommen. En… de kiender mit de lampions vanaovend ok, want et is Sunte Matten. In de hal ligt geld en lekkers klaor. De kiender zingen al lange gien lietien in et Stellingwarfs meer. Dat deden wi’j vroeger wel.
Sunte, Sunte Matten,
Sunt Matten op een stokkien,
rood, rood rokkien,
rood, rood reugeltien,
Sunt Matten op een vleugeltien.
En dan nog vule meer… Ik hebbe gien flauw idee wat een reugeltien is. Vermoedelik een riemwoord zonder veerdere betekenis.
Ik kreeg vandaege een kaorte van Harry en Jan uut Museum Kaap Skil in Ooldeschild op Texel. Dat is een prachtig museum. Vlak veur corona bin ik d’r ok een keer mit Harry west. Op ‘e kaorte staot een foto van een 17de ieuwse keuninklike jurk die vunnen is in een wrak in de Waddenzee. Wat is die jurk prachtig beweerd bleven!
