Sultan

Ik kieke disse weke elke aovend naor Paramount. Daor bin de prachtigste films te zien. Maendag zag ik Good Will Hunting mit glaansrollen van Matt Damon en Robin Williams. Schitterend! Wat is echt belangriek in et leven? Een protte geld, een beste baene, sukses, priezen, onderscheidings? Et is klaetergoold as et d’r echt op ankomt. Et gaot d’r omme daj’ iene bi’j je hebben daor aj’ omme geven. Gisteraovend Matt Damon in The talented Mr. Ripley, een spannende thriller. En dan komt vanaovend A beautiful mind mit Russell Crowe. Een biografie over de schrizofrene wiskundige John Nash. Ik hebbe al die films wel es eerder zien, mar ze bin zo mooi dat ik soms op et puntien van de stoel zitte te genieten.

Ik bin vandemiddag op vesite west bi’j Haarm en Jacob in Et Vene. We hebben et laeste jaor alle drieje in et ziekenhuus legen. Zi’j vanwege nogal wat maldere dingen as ik. Mar we bin d’r alle drieje nog. We hebben hiel gezellig praot. Ik kreeg van Haarm de dichtbundel Tegere die hi’j tegere mit Roely Bakker maekt het. Vermoedelik komt d’r nog een officiële prissentaosie. Dat moet aenlik wel, vien ik. We hopen over een goed vorrels jaor mit ’n drienend et oolde jaor weer uut te zitten!

En dan nog even over een Stellingwarver film. Op zaoterdag 27 september is d’r een middag over de film Sultan in de filmkarke van Steven de Jong in Hooltwoolde. Et begint om 2 ure. Taofelgaasten bin in ieder geval Abel Darwinkel en ik. En netuurlik is Steven d’r ok. Interesse? Kiek mar even op de website van de filmkarke bi’j de rebriek agenda. www.filmkerkwolvega.nl