Sultan van Bercoop

Tussen de bujjen deur he’k vandemiddag even naor Berkoop west om wat bosschoppen. Mien oolde huus ston te koop veur 925.000 euro. Ik zag op et bod bi’j de weg dat et verkocht is. Misschien wel veur nog meer. Mar wie d’r ok kommen te wonen, et zal altied mien huus blieven.

Drie van de tien veurstellings van de film Sultan van Bercoop in de Filmkarke van Hooltwoolde bin al uutverkocht. De wereldpremiere is op donderdagaovend 12 november. Die veurstelling is uutverkocht. Ik zal daor henne mit een goeie kammeraod. De veurstelling op 13 november is ok uutverkocht en die van 14 november (aovens) ok. Veur de middag bin d’r nog wel kaorten. Een protte goeie vrunden/kunde zal op zundagmiddag 15 november naor de Filmkarke om de film te bekieken. Dan bin ik d’r ok weer en veur dan bin d’r vermoedelik nog wel een stokmennig kaorten beschikber, daenk ik zo. Meensken die de film zien willen kun et beste now al kaorties bestellen, veurdat alles uutverkocht is. Kiek op ‘e agenda van de Filmkarke (www.filmkerkwolvega.nl). Steven de Jong het mien verhael Sultan uut de bundel Naozoemerlaand verfilmd en ik bin vreselik beni’jd naor et risseltaot. Op ‘e poster hieronder de mooie kop van Sybren Hofstra uut mien dorp mit zien (film)hond. Hi’j speult de heufdrolle en is Bauke. Op Spotify is de titelsong van de film Nooit te laete al te heuren. Et lietien is maekt deur Steven de Jong, Karst Berkenbosch en Johan Veenstra. Et wodt zongen deur Karel Wilms en ik vien dat hi’j dat hiel goed dot! Et is nooit te laete, ie bin nooit te oold om ni’je dingen mit te maeken en te ontdekken. Bauke kan d’r over mitpraoten!