Sultan in de laandelike kraanten

Vandaege was d’r gien fysiosport, ze hebben in Wolvege op ‘e dag nao Hemelvaortsdag de grundel op ‘e deure. Dat ik bin deensdagmorgen al henne west. Vandemiddag he’k wel naor kapster Bertha west. Eerst hewwe een koppien thee had en doe het ze me et haor extra mooi maekt veur de keuninklike ontvangst van de kommende woensdag in Noordwoolde. Nao de bekubberi’je hewwe een kop gruuntesoep mit ballegies en een croque madame had mit eier uut Ni’jhooltpae.

Vandeweke maekten tal van laandelike kraanten melding van et uutkommen van de Stellingwarver film Sultan van Bercoop. Ik kreeg van alle kaanten reakties. Dat d’r wo’n al vri’jwat kaorten van buten de Stellingwarven besteld. Ik zal op zundag 14 november tegere mit Ton en Marian uut Hippolytushoef naor de middagveurstelling van de film. Op 12 november is de premiere. Dan bin ik d’r vanzels ok bi’j. Dat is trouwens een besleuten veurstelling. Hieronder de prachtige filmposter mit de naemen van de akteurs d’r op.