Sultan en vertellen

Et was een drokke dag. Vandaege is d’r van 10 ure morgens tot 10 ure aovens een dri’jdag van de film Sultan in de filmkarke van Hooltwoolde. Ik bin d’r vandemorgen een flink schoft west om te kieken hoe zoks gaot. Vuuf menuten film opnemen kost haost een hiele dag. Et moet iederkeer weer opni’j. Ik hebbe naor ien van de laeste stokkies van de film keken. Mooi om te zien en te heuren hoe as aanderen mit mien tekst an de gang binnen. Speulers Sybren Hofstra, Henk Kromkamp, Karst Berkenbosch en Brecht Wassenaar zatten in een harbarg mit tal van figuraanten. Et was mooi om dit es mit te maeken. Wat een volk komt d’r an te passe. Steven de Jong, de regisseur leidde de boel. D’r zat een vrouw naost him. Was dat een skriptgirl… Ik hebbe wel es van dat woord heurd. En dan de mannen veur beeld en geluud. Zoks nemt een protte tied en kost een protte geld. Mar de film komt d’r. Et wodt een kotte film van ongeveer een half ure. Halverwege november komt d’r een Sultan-weke daor de film iederkeer in vertoond wodt. Kom et dan mar bekieken!

Nao Hooltwoolde he’k op een parkeerterrein an de grote weg in de auto een peer plakkies bolle opeten en doe bin ‘k naor et ziekenhuus van Et Vene gaon. Daor moch ik vertellen veur een groep van ongeveer een veertig vri’jwilligers in de Abe Lenstra Zael. Et vertellen gong wel goed. Ik hadde goed rippeteerd. Mar in et eerste verhael wa’k de draod even kwiet, mar dat hebben de meensken niet murken. D’r weren ok tal van meensken (van vroeger) uut de Stellingwarven. Een vrouw die indertied in de harbarg van Ni’jberkoop woonde. De buurvrouw van oonze JVS-siktaoris Titia die in Scharpenzeel woont. Een vrouw die geboren wodde an de Boverweg in Ni’jhooltpae. Et kammeraodske van Annie uut Blesdieke. Angeline die me ankondigde bleek een schoondochter van Johan Paulides en zien vrouw Sjoukje te wezen. Johan zat vroeger bi’j me op ‘e ulo. En Jelle Kingma, de man van zangeresse Grytsje daor a’k meerdere keren mit optreden hebbe, het een foto van me maekt. Zie hieronder.

Vanaovend zo’k aenlik ok nog vot moeten. In et gebouw van de Stellingwarver Schrieversronte wodt een rappot angaonde de (slechte) pesisie van et Stellingwarfs prissenteerd. Mar dat he’k ofzegd. Ik hebbe de pochel now wel uut. En morgen komt d’r weer een drokke dag.